خلطة فضفضة بالطريقة والمقادير

فيني بوسة غير - مؤدبة كالعادة << شقصدك يعني

هالبوسة أحسها بتطلع من قلب قلبي <<< لاتتهورين

ماابي أقولكم عن انتشار فيروس الكآبة والغلقة والزهق المنتشر

بس والله من جد قــــول يارب وصدقوني ماورا هالكلمة إلا كل خير

قبل يومين كنت متضايقة ,, شنو متضايقة إلا مفزعة الدنيا حالتي كانت موت صعبة بس الله ستر ماجاني شي

رسلت مسج لصاحبتي قلت لها أنا متضايقة وبنام ,, شوي ودقت علي تطمن

تصدقون في عشر دقايق أحس راح كل شي أحس مافيني شي

ياربي شقد نستانس لما يكون في أحد معنا

يمة يمة يمة كاني أحبها مرة صرت أموت فيها هالانسانة (البوسة لها)

من جد الكلمة الحلوة تعمل عمايل // والكلمة الشينة برضو تعمل عمايل

...

...

يوم ثاني جلست احوس بين ربعي المدونين وكنت اشوف الردود اللي منهم لي والعكس

أحيان الردود تخليك تعيش جو مو طبيعي كنك جالس بمجلس سوالف وحولك ناس <<< البنت فيها شي

ماعلينا ,, طبعاً أنا من حزب البنات وهـ كل البنات المدونات استانس عليهم وانتظر ردودهم وتعليقاتهم <<< كيفي !!

أما الشباب بعد والله ماعليهم زود بس في ثنين من جد ( ماابي اقول ) <<<< تعجز الكلمات

المهم في رد من كثر ماهو يجنن دمعت عيني وحمدت ربي إني زهقانه ومن الفراغ أقرا التعليقات

وهو رد في مدونة mr.caffen موضوع غسيل ماادري ليه أثر فيني الرد

يمكن من اعتزازي بأبــوي وإني ماأشوفه وشقد كنت أتمناه يشوفني وأنا بهالعمر .. .. صراحة ماادري :(

نص العبارة اللي كتبها أخوي (ودي ابوس راس أحمد اللي انجب لنا بنت ذوق ودمها عسل مثلك ..) <<< وهـ فديتني << يامغرورة

تدورون لما قرأتها دمعت عيني وحسيت أبي أضم أمي أو صديقتي :( طبعاً مالقيت إلا المخدة ضميتها

وتمنيت الدنيا تمشي بسرعة ونمـــــوت ونصير في الـــجنة يارب - وأشوف mr.caffen هناك وأشوف أبوي وأقوله يللا قوم بوس راسه

بعدين فكرت الحين في الجنة نتغطى عن بعض <<< دموعي تنزل ويوم سألت نفسي هالسؤال مت ضحك

بس من جد شلون !! !!

يالله شقد الدنيا قصيرة وصغيرة وحلوة لما الواحد يكون مع اللي يحبهم بس القدر أقوى منا

لاتزعلون // مااعتقد تسونها أصلاً ,, ترى كولكم تعليقاتكم حلوة وتسعدني دوم

يسلمو لكم كلكم من جد أحس هنا عالم ثاني أحس إني بعيدة عن جو الغلقة والكآبة اللي يعاني منها المجتمع

//

احساس أنثى والملاذ الأخير وأسيرة اللوحة واحساس طفلة ,, مرحبا أيها الممتحنات الحمدلله على السلامة وش سويتوا بشرونا بالنتايج ؟؟

سيمفونيات أنثى ,, ملكة الاحساس <<< ياربي هالبنات طولوا غيبتهم

فراشة مدونتي ,, متى يجي السبت ؟؟ وياااااااااارب ينجحك في كول المواد <<<< قولوا آمين <<< ان حملت مادة باستخف إذا كل هالأمة قالت آمين وتحمل مادة :( موشي <<< فيها عين <<< وبس كل شي عين

في بعد سالفة بس عشان مايصير البوست طويل بقولها لكم بعدين

//

ومن واجب الضيافة قلت أسوي لكم قهوة تتسلون وانتوا تقرون هنا

وهذه عبارة عن (قهوة فرنسية مرة خيالية)

المقادير:

ايس كريم فانيللا (سيحها على نار هادئة الى ان تسخن قبل الغليان ) سيح ما يكفي لنصف كوب - 2-3 ملعقتين صغار كوفي ميت - ملعقة نسكافيه - مكسرات (لوز+ كاجو+ فستق او اي مكسرات تحبها) قطعها قطع صغيرة - نصف كوب ماء مغلي .

الطريقة :

اضع ( كوفي ميت+ نسكافيه) في كوب ثم اضيف الايس كريم و اخلط جيدا اضيف الماء المغلي مع التقليب وفي النهاية اضيف المكسرات

اممممم أما طريقة الحلا الآيس كريم الموجود أعـــلاه اممممم <<< تراها متوهقه .. أقصد الطريقة سرية

تعالوا بيتنا وأسويه لكم

..

بالعافية عليكم